परिवहन मंत्री दिवाकर रावते यांची ‘सुयोग’ला भेट

नागपूर : पहिवहन मंत्री दिवाकर रावते यांनी आज सकाळी सुयोग पत्रकार निवासाला भेट देऊन पत्रकारांशी अनौपचारिक संवाद साधला.

एस. टी. महामंडळाच्या कारभारात पारदर्शकता व गतिमानता यावी यासाठी अनेक निर्णय घेतल्याची माहिती त्यांनी यावेळी दिली. ते म्हणाले की, “बसच्या वेळा व चालक-वाहकांच्या ड्युटी याबाबत संगणकीकृत प्रक्रिया राबवली जाणार आहे. त्यामुळे ड्युटीवाटपात पारदर्शकता येईल व बसच्या वेळा नियमित होऊन विद्यार्थी, तसेच रोज प्रवास करणारे नागरिक यांना लाभ होईल. पदभरती व परवाना प्रक्रियाही ऑनलाईन करण्यात आली आहे. 15 वर्षे सेवा झालेल्या कर्मचाऱ्यांना पून:प्रशिक्षण दिले जाणार आहे. केवळ वातानुकुलीतच नव्हेतर इतर बसही अधिक आरामदायी व्हाव्यात, यासाठी बदल केले जात आहेत.”

अत्यंत खेळीमेळीच्या वातावरणात ही चर्चा पार पडली. शिबिरप्रमुख दिलीप जाधव, तसेच माहिती व जनसंपर्क महासंचालनालयातर्फे इर्शाद बागवान यांनी स्वागत केले.

শেয়ার করুন