by 
चंद्रपूर-नागपूर मार्गावरील बोरखेडीजवळ ट्रकची कारला धडक बुटीबोरी : चंद्रपूरहून नागपूरला येणाऱ्या महिंद्रा कारला ट्रकने धडक दिल्याने तिघेजण जागीच ठार झाले. ही घटना बोरखेडीजवळ घडली. मृतात चंद्रपूर जिल्हा मनसेचे उपाध्यक्ष सुधाकर राठोड, शिवसेनेचे कैलास संगमवार, बाबाराव उलमाले यांचा समावेश आहे. यात चालक सूरज गणवीर जखमी झाला. त्याला नागपूर मेडिकल कॉलेजमध्ये उपचारासाठी हलविण्यात आले.
राजुरा विधानसभा क्षेत्राचे मनसे जिल्हा उपाध्यक्ष सुधाकर राठोड (वय 49) हे काही कामानिमित्त स्वमालकीच्या महिंद्रा कार (क्र. एम.एच. 34-एएम 6044)ने नागपूरला जात होते. ही कार चालक सूरज गणवीर चालवित होता. त्यांच्यासोबत चंद्रपूर येथील शिवसेनेचे कार्यकर्ते कैलास संगमवार आणि बाबाराव उलमाले होते. बोरखेडी टोलनाका ओलांडल्यानंतर विरुद्ध दिशेने भरधाव आलेल्या ट्रक (क्र. एम.एच.34 एबी-2651)ने कारला धडक दिली. अपघात एवढा भिषण होता की, कारचा दर्शनी भाग चेंदामेंदा झाला. घटनेत सुधाकर राठोड, शिवसेनेचे कैलास संगमवार, बाबाराव उलमाले हे तिघेही जागीच ठार झाले. चालक सूरज गणवीर हे गंभीररित्या जखमी झाले.
