by
ग्रंथोत्सव
2013 चा समारोप
चंद्रपूर,
दि. 25 - महाराष्ट्र राज्य साहित्य आणि संस्कृती मंडळ, जिल्हा माहिती कार्यालय व जिल्हा ग्रंथालय चंद्रपूर यांच्या संयुक्त विद्यमाने चांदा क्लब
मैदानावर आयोजित चंद्रपूर ग्रंथोत्सवातील पुस्तक प्रदर्शनात सुमारे पाच लाख
रूपयांच्या ग्रंथ विक्रीची विक्रमी उलाढाल
झाली. तीन दिवसीय या प्रदर्शनात 25 स्टॉल लावण्यात आले होते.
22, 23 व 24 मार्च या तिनही दिवशी
ग्रंथोत्सवातील स्टॉलला पुस्तक प्रेमीनी मोठया प्रमाणात भेट दिली व खरेदी
केली. विशेषत: महाविद्यालयीन तरुण
तरुणींनी स्टॉलला भेट देवून स्पर्धा परिक्षेची पुस्तके विकत घेतली.
स्पर्धा परिक्षेच्या पुस्तकावर 50 टक्के सवलत देण्यात आली होती. इतरही स्टॉलवरही 10 ते 40 टक्के सवलतीच्या दरात
पुस्तके विक्री करण्यात आली. पहिल्या
दिवशी अंदाजे दिड लाख, दुस-या दिवशी दिड लाख तर समारोपाच्या दिवशी दोन लाख
रुपयांचे ग्रंथ चंद्रपूर वाशियांनी विकत घेतले.
या विक्रीबद्दल स्टॉल धारकांनी समाधान व्यक्त केले असून चंद्रपूरकर
ग्रंथप्रेमीचे आभार मानले.
प्रदर्शनात तिन्ही
दिवस पुस्तक प्रदर्शनाला उत्सर्फुत प्रतिसाद मिळाला. यावेळी विविध पुस्तकांच्या
स्टॉलवर विद्यार्थी व नागरीकांनी मोठ्या संख्येने भेट देऊन पुस्तक प्रदर्शन व
विक्रीचा लाभ घेतला. या प्रदर्शनात एकूण 25 स्टॉल लावण्यात आले होते. त्यात जिल्हा
ग्रंथालय, महाराष्ट्र शासनाचे मुखपत्र असलेले लोकराज्यचे स्टॉल, चंद्रपूर येथील
राणाज पुस्तकालय, ज्ञानगंगा बुक्स, केसन्स
बुक डेपो, नवनीत प्रकाशन, साईबाबा बुक सेलर, महालक्ष्मी बुक डेपो, लक्ष्य स्पर्धा
परीक्षा केंद्र, साईन कट्टा प्रकाशन, तेजज्ञान फाऊंडेशन, ग्रंथाली गुप्ताजी (मुंबई),
सुधीर प्रकाशन (वर्धा), विद्या विकास (नागपूर), पंजाब बुक सेलर (गडचिरोली),
मंगेश प्रकाशन (नागपूर), मध्यम इंटरप्रायजेस (चिरोली), अरिहंत बुक्स (चिमूर),
लोकवाङमय प्रकाशन (मुबंई) यासह विविध स्टॉलचा समावेश होता.
जिल्हाधिकारी विजय वाघमारे यांनी
ग्रंथोत्सवातील सर्वच 25 स्टॉलला भेट देऊन विविध पुस्तकांची पाहणी केली. पुस्तक खरेदीला वाचक प्रेमींचा चांगला प्रतिसाद
मिळाला असून पुढील वर्षीही ग्रंथोत्सवाचे आयोजन करून अधिक पुस्तकांचे स्टॉल
ठेवण्यासाठी प्रयत्न करणार असल्याचे मत श्री. वाघमारे यांनी व्यक्त केले. 23 मार्च
रोजी जिल्हा परिषदेचे मुख्य कार्यकारी अधिकारी सी.एस.डहाळकर यांनी ग्रंथ
प्रदर्शनीला भेट देवून ग्रंथ खरेदी केली.
जिल्हाधिकारी वाघमारे यांनी ग्रंथ प्रदर्शनीला भेट दिली त्यावेळी निवासी उपजिल्हाधिकारी प्रवीण बटकेलवार, तहसिलदार
गणेश शिंदे, जिल्हा माहिती अधिकारी रवी गीते, नायब तहसिलदार तळपदे उपस्थित होते. 
