नवी ऊर्जा, व्यक्तिगत संबंध व कलागुणांना फुलविणारा उपक्रम म्हणजे दिवाळी पहाट

नागपूर/प्रतिनिधी:

चंगळवादी, भोगवादी,ग्राहकवादी व आभासी दुनियेमुळे आपले जीवन जणू स्वार्थी बनले आहे. अशा परिस्थितीत, ऋतू बदल, नवे वस्त्र, स्वच्छता, वेगळा आहार, व्यवहार शिकवण, स्त्री सन्मान, व्यक्तिगत नातेसंबंध, इतरांप्रती प्रेमभाव, उत्तम आचार, विचार व संस्कारासह आनंदोत्सव साजरा करणे म्हणजे खरी "दिवाळी". एक छोटी पणती आपल्या तेजाने लगतचा परिसर प्रकाशमान करते, अगदी त्याचप्रमाणे, प्रत्येकाने आपल्या निसर्गदत्त गुणांनी आपला परिसर तेजोमय करण्याची शिकवण दिवाळी या सणापासून मिळते. 

कोराडी औष्णिक विद्युत केंद्राचे मुख्य अभियंता अभय हरणे यांचे विद्युत वसाहत कोराडी येथील निवासस्थानी "दिवाळी पहाट" या संगीतमय कार्यक्रमाचे लक्ष्मीपूजनाच्या दिनी आयोजन करण्यात आले. 

पहाटेच्या गारव्यात व मंद प्रकाशात "एक दंताय वक्रतुंडाय गौरी तनयाय धीमही" या श्रीगणेश स्तवनाने सारंग जोशी यांनी दमदार सुरुवात केली व त्यानंतर "घनश्याम सुंदरा श्रीधरा","प्रभाते सूर नभी रंगती","गगन सदन तेजोमय" "ही गुलाबी हवा वेड लावी जिवा","केव्हा तरी पहाटे" हि पहाट गीते सादर करण्यात आली. त्यानंतर, "कानडा राजा पंढरीचा", "बोलावा विठ्ठल पहावा विठ्ठल" सारख्या भक्ती गीतांनी कार्यक्रमाला अध्यात्मिक साज चढला. एकाहून सरस एक अशी भाव गीते सादर करण्यात आली.त्यात "डौल मोराच्या मानचा","फुलले रे क्षण माझे","मेहंदीच्या पानावर", "मायेच्या हळव्या स्पर्शाने", "जांभूळ पिकल्या झाडयाखाली" "जीवनात ही घडी अशीच राहू दे","मी डोलकर डोलकर डोलकर दर्याचा राजा" इत्यादी गीतांचा समावेश होता. समारोपीय सत्रात "रंगात रंग तो श्याम रंग", "आई भवानी तुझ्या कृपेने","मल्हारवारी मोतीयाने द्यावी भरून", उदे ग अंबे उदे, जयोस्तुते, सारख्या लोकप्रिय गीतांनी दिवाळी पहाट कार्यक्रमास कळस चढविला. 

नागपुरातील सुप्रसिद्ध गायक सारंग जोशी, सोनाली दीक्षित व मोनिका देशमुख तर वादक मंडळींमध्ये राजा राठोड(की बोर्ड), प्रशांत नागमोते(तबला), श्याम ओझा(संवादिनी), राजू ठाकूर(ऑक्टोपॅड) आणि सूत्रसंचालनातून डॉ.मनोज साल्पेकर यांनी आपल्या शब्द सामर्थ्याने दिवाळी पहाटचे सुरेल गुंफण करीत उपस्थित रसिक प्रेक्षकांना मंत्रमुग्ध केले. शंकर महादेवन,आशा भोसले, सुधीर फडके,स्वप्नील बांदोडकर, यशवंत देव, सुरेश भट,हृदयनाथ मंगेशकर आणि श्रीधर फडके यांच्या गीतांमुळे दिवाळी मंगलमय पहाट अधिकच दर्जेदार झाली. 

राज्याचे ऊर्जावान ऊर्जामंत्री ना.चंद्रशेखर बावनकुळे ह्या कार्यक्रमास सपत्नीक उपस्थित होते. त्यांनी उपस्थितांना दिवाळीच्या शुभेच्छा दिल्या. वीज उत्पादन क्षेत्रातील योगदानाबद्दल अधिकारी-कर्मचाऱ्यांचे त्यांनी अभिनंदन केले व आगामी आव्हानांकरिता सहकार्य करण्याचे सूतोवाच केले. 

ह्या कार्यक्रमाला महानिर्मितीचे कार्यकारी संचालक राजू बुरडे, मुख्य अभियंते राजकुमार तासकर, राजेश पाटील तसेच महादुला नगर परिषदेचे उपाध्यक्ष राजेश रंगारी प्रामुख्याने उपस्थित होते. "दिवाळी पहाट" सारख्या कार्यक्रमातून नवी ऊर्जा, भेटीगाठी व नाती संबंध अधिक दृढ होत असल्याचे अभय हरणे यांनी सांगितले.

अभय हरणे यांनी मागील वर्षापासून दिवाळी पहाट या कार्यक्रमाचे कौटुंबिक आयोजन सुरू केले असून ह्या कार्यक्रमास महानिर्मितीचे आजी-माजी अधिकारी,अभियंते, कर्मचारी, संघटना प्रतिनिधी, पत्रकार मंडळी व कोराडी वसाहतवासी मोठया संख्येने आवर्जून उपस्थित असतात हे विशेष. प्रवीण बुटे यांनी उपस्थितांचे आभार मानले. गरमागरम अश्या स्वादिष्ट दिवाळी फराळाने संगीतमय पर्वाची सांगता झाली.

বিস্তারিত পড়ুন

वीज केंद्रातील वातावरण स्वच्छ,सुंदर व हिरवेगार करणे हि प्रत्येकाची जबाबदारी:चंद्रकांत थोटवे

४४ व्या वर्धापन दिनाची शानदार सांगता

वऱ्हाडी तडका ने पोटभर हसविले

गाणी, नृत्य, मिमिक्री विशेष आकर्षण   

नागपूर/प्रतिनिधी:

औष्णिक विद्युत केंद्र व परिसरातील वातावरण उत्तम ठेवल्यास त्याचा सकारात्मक परिणाम दैनदिन जीवनावर दिसून येतो त्यामुळे वीज केंद्रातील अंतर्गत व बाह्य वातावरण सर्वोत्तम ठेण्यासाठी प्रत्येकाच्या पुढाकाराची गरज असल्याचे प्रतिपादन चंद्रकांत थोटवे संचालक महानिर्मिती यांनी केले. कोराडी औष्णिक विद्युत केंद्राच्या ४४ व्या वर्धापन दिनाच्या समारोपीय समारंभात ते मारोती मंदिर मैदान कोराडी येथे बोलत होते. कार्यक्रमाला प्रमुख अतिथी म्हणून महानिर्मितीचे संचालक(संचलन) चंद्रकांत थोटवे, विशेष निमंत्रक म्हणून कार्यकारी संचालक विनोद बोंदरे, राजू बुरडे, महाजेम्सचे संचालक सुधीर पालीवाल, मुख्य अभियंते राजकुमार तासकर,अनंत देवतारे,राजेश पाटील, दिलीप धकाते, रमेश वैराळे(सचिव) प्रामुख्याने मंचावर उपस्थित होते. समारंभाचे अध्यक्षस्थान कोराडी वीज केंद्राचे मुख्य अभियंता अभय हरणे यांनी भूषविले. 

प्रारंभी प्रास्ताविकातून राजकुमार तासकर यांनी वर्षभरातील महत्वपूर्ण कार्याचा मागोवा घेतला व ४४ व्या वर्धापन दिन आयोजनामागची भूमिका विषद केली तर वर्धापन दिन आयोजन समितीचे सचिव रमेश वैराळे यांनी अहवाल वाचन केले. ४४ व्या वर्धापन दिनानिमित्त उर्जामंत्री नामदार चंद्रशेखर बावनकुळे व प्रधान सचिव ऊर्जा तथा प्रभारी अध्यक्ष व व्यवस्थापकीय संचालक महानिर्मिती अरविंद सिंह यांच्या शुभेच्छा संदेशांचे वाचन करण्यात आले. 

याप्रसंगी सुरक्षिततेवर आधारित “ऊर्जा सुरक्षा” या चित्रफितीचे मान्यवरांच्या हस्ते विमोचन करण्यात आले. तसेच उल्लेखनीय कार्याबद्दल धीरज मोरे(सर्पमित्र), पि.डी.नाईक(वाहनचालक), वसंत भगत(सामाजिक कार्य), तसेच विविध क्रीडास्पर्धांच्या सांघिक विजेत्या व उप विजेत्या स्पर्धकांना मान्यवरांच्या हस्ते पारितोषिके देण्यात आली.

याप्रसंगी राजू बुरडे म्हणाले कि कोराडी वीज केंद्र हे महत्वाचे वीज केंद्र असल्याने महत्तम वीज निर्मितीचे ध्येय गाठण्यासाठी अधिक प्रयत्न होणे गरजेचे आहे. विनोद बोंदरे म्हणाले मागील दोन वर्षात महानिर्मितीने देश-विदेश पातळीवर उल्लेखनीय कामगिरी बजावली आहे व त्याचा प्रत्यय वीज क्षेत्रातील तज्ज्ञ व्यक्तींकडून आता होत असल्याचे त्यांनी उदाहरणासह सांगितले. सुधीर पालीवाल म्हणाले कि, सत्तरच्या दशकातील तरुण अभियंत्यांना रोजगार व त्याकाळात नागपूर जिल्ह्यातील उद्योजकांना व्यापार-उदिमासाठी कोराडी वीज केंद्राचे मोठे योगदान लाभले असल्याचे त्यांनी सांगितले. अध्यक्षीय भाषणातून अभय हरणे यांनी सांगितले कि जगात ज्या-ज्या चांगल्या गोष्टी आहेत त्याची अंमलबजावणी करणे, रास्त दरात महत्तम वीज उत्पादनाचे ध्येय गाठणे हा संकल्प वर्धापन दिनाच्या निमित्ताने करायला हवा.

वर्धापन दिन समारोपीय समारंभाला उप मुख्य अभियंते गिरीश कुमरवार, अरुण वाघमारे, सुनील सोनपेठकर, अधीक्षक अभियंते भगवंत भगत, डॉ. भूषण शिंदे,विराज चौधरी,जगदीश पवार,संजय रहाटे, शैलेन्द्र गर्जलवार, अशोक भगत, कन्हय्यालाल माटे, विजय बारंगे, अरुण पेटकर, नंदकिशोर पांडे उप महाव्यवस्थापक(मानव संसाधन), मुकेश मेश्राम उप औद्योगिक संबंध अधिकारी तसेच विविध संघटनांचे पदाधिकारी, अधिकारी-विभाग प्रमुख, अभियंते, तंत्रज्ञ, कर्मचारी व कुटुंबीय प्रामुख्याने उपस्थित होते. 

समारंभाचे सूत्र संचालन नेहा फुके व पराग लांबे यांनी तर आभार प्रदर्शन मुकेश मेश्राम यांनी केले. कार्यक्रमाच्या यशस्वीतेमध्ये वर्धापन दिन आयोजन समितीचे सर्व पदाधिकारी व सदस्यांचे मोलाचे सहकार्य लाभले.  

वऱ्हाडी तडका :
वैदर्भीय भाषेतील व्यंगात्मक शैलीतील वऱ्हाडी तडका स्थानिक कलाकारांनी दमदार अभिनयासह सादर केला. यामध्ये कोराडी वीज केंद्र व परिसरातील दैनंदिन घडामोडी, बोली भाषा, कामकाजाच्या ठिकाणचे किस्से रसिकांच्या मनाला भावले व सलग २५ मिनिटे प्रेक्षकांना ह्या कलावंतांनी प्रेक्षकांना मनसोक्त हसविले. 

বিস্তারিত পড়ুন