साधनाताई आमटे यांची प्रकृती अत्यवस्थ

साधनाताईंवर आनंदवनात उपचार

चंद्रपूर - ज्येष्ठ समाजसेविका साधनाताई आमटे यांची प्रकृती अत्यवस्थ असून, त्यांच्यावर आनंदवनात उपचार सुरू आहेत. डॉ. विजय पोळ आणि वैद्यकीय चमू उपचार करीत आहेत.
गेल्या आठ ते 10 दिवसांपासून साधनाताईंनी अन्नग्रहण करणे सोडले आहे. त्या केवळ एक-दोन चमचे फळांचा रस घेत असल्याने त्यांच्या प्रकृतीत सुधारणा दिसत नसल्याची माहिती आनंदवनाच्या सूत्रांनी दिली आहे. दोन वर्षांपूर्वी त्यांना कॅंसर झाला होता. त्यानंतर त्यांच्यावर शस्त्रक्रियाही करण्यात आली होती. 86 वर्षीय साधनाताईंच्या किडनीवर गतवर्षी सूज आल्याने त्यांना 29 एप्रिलला नागपूरच्या धंतोली येथील अवंती रुग्णालयात दाखल करण्यात आले होते. तेथे त्यांच्यावर डॉ. श्रीखंडे व डॉ. एस. एम. पाटील यांनी उपचार केले. तेव्हा त्यांची प्रकृती सुधारली होती. त्यामुळे त्यांना नऊ मे रोजी सुटी देण्यात आली. तेथून आनंदवनात परतल्यानंतर आनंदवनाचे वैद्यकीय अधिकारी डॉ. विजय पोळ हे त्यांची देखरेख करीत आहेत. साधनाताईंची प्रकृती खालावत असल्याने त्यांचे अनेक हितचिंतक आनंदवनात येऊन त्यांची चौकशी करीत आहेत. गोवा न्यायालयाच्या न्यायाधीशांनीदेखील आज आनंदवनात भेट देऊन ताईंच्या तब्येतीची विचारपूस केली. डॉ. विकास आमटे, डॉ. प्रकाश आमटे, डॉ. शीतल आमटे, डॉ. अभय बंग आणि आमटे परिवारातील सर्व सदस्य आनंदवनात दाखल झाले आहेत

শেয়ার করুন